Astrological houses – Jyotish ke baarah bhav poore maanav jivan ka pratichitran karte hain. Jyotish kundli ya janm kundli 12 samaan bhaagon me vibhajit hoti hai jinhe Jyotish bhav ya Astrological houses kahte hain. Har bhav 30 degree ka hota hai or is tarah ye poore praakritik jyotish chakra ka 360 degree banta hai.
Jyotish ka har ye bhaav maanav jivan ke kisi na kisi area se juda hai. Jyotish ke ye bhaav ya Astrological houses jivan ke khaas khaas kshetron ko represnt karta hai.
Janm ke samay jo rashi poorv kshitij me uday hui thi, us rashi ko kudnli ke pahle bhaav ya pahle ghar me sthit kar, baaki gyaarah raashiyon ko agahativat (anticlockwise) roop se baaki ke gyaarah bhaavon me sthit kar diya jaata hai. Maan lijiye janm ke samay Kark rashi uday ho rahi thi to kark rashi ko kundli ke pahle bhav me, doosre me Simh, teesre me Kanya aadi is tarah rashiyon ka kram banega.
Janm ke samay jo grah rashichakr ki jis rashi me sthit thi, kundli me bhi unhe usi rashi me sthit kar diya jaata hai. Raashiyon or grahon ki sammilit urja in bhaavon me operate hokar, un bhaavon se jude anubhavon ko hamare jivan me create karte hain.
Ye astrological houses jivan ke vibhinn areas se connected hain or hamare jivan ke un ansuljhe tukdon ko chitrit karte hain jo maanv jivan naam ki chitra khand paheli (jig-saw puzzle) me lag kar use suljhaati hai. Jo grah or rashi in bhaavon me sthit honge, us bhaav se jude jivan ke usi area ko ye prabhavit karenge.
Maan lijiye lagn Simha raashi hai or usme Mangal sthit hai. Ab lagn aapki personality se sambandhit pahla bhav hai, Simha agni tatv ki raashi hai or Mangal ugra planet hai – to ye combination aapko ek krodhi or ugra personality dega. Ye baarah bhav milkar samooche jivan ko represent karta hai jaisa jivan hame bhogne ko mila hai.
Agar ham sormandal or uske khagoleey pindon (celestial bodies) par gaur karen or manav jivan ke vbhinn pahluon par gaur karen to paayenge ki har celestial body jivan ke kisi anuroop pahlu se judi hai. Jaise navagrahon me Mangal ko senapati or prakram ka graha maanaa gaya hai. Ab kundli me yadi Mangal teesre ghar me kamjor ya peedit avastha me hoga to jatak me himmat or parakram ki kami hogi.
Aise hi Budh ko navagrahon me kumar ya prince ki upaadhi mili hui hai to agar pratham bhaav me Budh sthit ho to jatak sada apne aayu se kam aayu ka dikhega.
Jivan ka poora failaav in baarah bhaavon me mapped hai jo hamare jivan ke vibhinn avasthaaon se juda hai. Jaise lagn bhav janm se, dwiteeya bhav bachpan se, is tarah chalta hua dwadash bhav mrityu se sambandhit hai. Agar shaaririk drishti se dekha jaaye to lagn bhav sar se, dwiteey bhav mukh se, triteey kandhe or baaju se, is tarah chalta hua dwadash bhav pairon se juda hai.
Neeche diye gaye links me in baarah jyotish bhaavon ke main karakatv (significations) ko sankshipt roop me diya gaya hai. har link par teen teen bhavon ka varnan hai jise aap click kar ke padh sakte hain. Ye vivaran general details hain, jyaada vistrat vishleshan ke liye sapoorn kundli ka avlokan karna padta hai.
Join the Discussion!