4th house – Chaturth jyotish bhav ko sukh bhav or bandhu bhav bhi kahte hain. Mukhyata is bhav se sukh soubhagya evam iski sthirta dekhi jaati hai. 4th house ya 4th lord kisi bhi tarah peedit ho to jivan me sukh ka abhav rahata hai.
Agar lagna se dekhen to 4th house doosra kendr hai. Kisi bhi cheej ko khada karne ke liye pillar ki jaroorat padti hai jaise ki table ko khada karne ke liye char pillar jaroori hai vaise hi kundli me bhi char pillars hain jinhe kendr kaha gaya hai – ye hain Pratham (lagna), chaturth, saptam evam dasham bhav.
4th house ko kundli ka sabse pavitr kendr maana gaya hai. Kundli ke uprokt charon kendron me lagn ko trikon maana gaya hai, saptam to achha kendr nahi maante, dasham ko lagn se bhi important karm bhav maana gaya hai, par in sabme sabse shuddh or pavitr kendr 4th house hai. 4th house ka sambandh maa se hai q ki ye itna pavitr bhav hai ki utni hi pavitr vishay maatratva, se hi iska sambandh ho sakta hai. Ye sukh bhav bhi isiliye kaha gaya hai ki jivan me sahi maayne me pahla or permanent sukh maa hi deti hai.
4th house se kya dekhte hain?
Chaturth jyotish bhav se maa, maa se paarasparik relation, ghar ka sukh or aram, ghar ka vatavaran, vaahan, prasannata, bhumi, nivas sthaan, paitrik ghar, achal sampaati maveshi, gharelu sukh, naukar chaakar, vyavsay me asafalta, aay ka loss, janmbhumi se visthaapan, jan sadharan (public), buniyadi shiksha or sansad (parliament) aadi dekha jaata hai.
aadhunik samay me kaarkhaane factories, studios or samajik sansthan (philanthropic institutions) aadi bhi 4th house se hi dekhe jaate hain.
Physically 4th house chhati ya vakshasthal, hriday or fefdo (lungs) se sambandh rakhta hai. Kaalpurush rashi chakr me 4th house Karka rashi hai jiske swami Chandra hai jo apne man, mastishk evam happiness ke karkatva ko yahan falibhoot karte hain. Shastra kahte hain “Chandrma manassojatah” yaani chandrma man ka kaarak hai. Chandr, Shukra, Budh evam Mangal 4th house ke kaarah hain.
You may like to read: Karka rashi in Hindi – कर्क राशी के लोग अलग क्यों होते हैं?
Or you may like this: Navagraha Moon – चन्द्र को ज्योतिष में सबसे महत्वपूर्ण क्यों माना जाता है?
Ye bhav ek sashakt kendr hai or pahla moksh kon (salvation trine) hai. Kundli ka ye mukhya stambh hai or shubh grah chandr or shukr ko yahan dishatmak bal milta hai or ye grah yahan achhe maane gaye hain.
Vaise jyotish me bhav ke swami ka bhav me sthit hona shubh maana gaya hai or chaturthesh ka chaturth me hona bhi shubh hai, aisa jatak bade bade alishan makan aadi banayega par yahan atishyokti yah hai ki vo unme rah nahi paata. Vo isliye q ki ye ek tarah ka bhumi dosham banta hai jab chaturthesh chaturth me ho or ashubh grahon se sambandh banaaye ya usme natural strength na ho.
5th House – Putra bhav tatha poorva punya bhav
Pancham bhav ko putra bhav or poorva punya bhav se bhi jaana jaata hai. is bhav se mukhyata bachhe or puva punya tatha shiksha gyaan aadi dekha jaata hai. shastron ke anusar aatma pancham bhav se pravesh kar, lagna me shareer prapt kar dasham bhav se karm karke navam bhav se prasthan karti hai.
Is janm ke achhe karmfal bhogne ke liye pancham bhav tatha panchmesh ka sudhradh hona bahut jaroori hai. Is janma ke jivan ki safalta or vifalta ke beej pancham bhav me hai. Jivan ki sarvshreshth uplabdhi panchm bhav or panchamesh ke sthiti par nirbhar karti hai. Pachmesh ki lagna me upasthiti directly pichhle janm se judi hai matlab poorv janm ke baad bin kisi antraal ke seedha ye janm mila hai.
Pancham bhav se ky dekhte hain?
Panchma bhav se shiksha or gyaan, vidvatta, intelligence, buddhi evam iska jhukaav, bachhe, poorva punya tatha picchle janma ke karm, sattebaaji, speculation, yogyata, shastron ka gyaan, bhagvat bhakti, ved vedaang evam mantron ka gyaan, siddhi evam adhyatm saadhna, flirtations evam prem sambandh, yaaddaasht, emotions, maan maryada pratishtha or isse girna or vyavsaay naukri me badlaav ya break (dasham se ashtam bhav hone ki vajah se) aadi dekhe jaate hain.
5th house pahala shuddh trikon bhav hai. Kundli me yu to teen trikon bhav hai – pratham bhav, pancham bhav evam navam bhav, par pratham bhav kendra bhav bhi hai, isiliye pancham ko pahla trikon bhav maana gaya hai.
Pancham bhaav hamare karmon ka bank balance dikhata hai. Jitne sanchit poorva punya hamare poorv janmon se jama hain pancham unhe represent karta hai. Or ye sanchit karm hamare jivan ke har pahlu ko affect karta hai isiliye ye bhav itna important ho jaata hai.
Pancham bhav se santaan ko bhi dekha jaata hai. Puraane jamaane ki kundliyon me sarvpratham likha hota tha “Padvi poorva punyaanaam” iska kya matlab hai? Iska matlab hai pita ki ye padvi jo aapko mili hai vo poorva punya se mili hai. To 5th house ke poorva punya or santaan ke kaarakatv ko ye ek pankti poori tarah se falibhoot karti hai.
Adhyatm me hamari aatma kitni aage badhi hai ye bhi 5th house se dekh sakte hain. Yahi nahi, is bhav se ye bhi prakat hota hai ki jatak mantra saadhna se adhyatm ki nayi unchayion ko chhoo sakta hai ya nahi, isiliye ise Mantra Bhav bhi kaha gaya hai.
Navam bhav se navam hone ki vajah se ye bhav “Pitru bhav” bhi banta hai. Agar is bhav ya bhavesh par kisi tarah ka dush prabhav ho ya peedit to ye dikhaata hai ki kundli me “Pitru dosh” hai. Iska matlab hai ki jatak ne jaane anjaane me poorv janm me koi aisa kaam kiya hai jisse poorvajon ke kop ka bhaagi ban gaya hai. Pitru dosh kis had tak hai ye is bhav ya bhavesh par pad rahe dushprabhav se aank sakte hain.
Poorva punya bhav hone ki vajah se pancham bhav ek bahut important bhav hai q ki hamara samast jivan hamare poorva punyon par aadhaarit hai . Ek accha sudhradh 5th house vivek, sene of एक अच्छा सुद्रढ़ पंचम भाव विवेक, sense of discrimination or gahara adhyatm gyaan deta hai jo shaastron ke adhyayan or adhyatmik sadhna se upajti hai. Ek accha pancham bhav bhedbhaav ka achha samarthya deta hai. Brahaspati is bhav ke kaaak hai.
You may like to read: Navagraha Jupiter – धर्म, ज्ञान एवं अध्यात्म का कारक ब्रहस्पति
Physically maanav shareer rachna me pancham bhav chaturth se agle yaani Liver, pet evam tilli (spleen) ko dikhata hai. Liver hamare shareer ka ek atyadhik intelligent or jatil ang hai jiska koi part nikaal lene par, apne aap ko dubaara grow karne ke kshamata rakhta hai. Liver hamare shareer ke vibhinn jatil rasayanik kriyaon (chemical processes) ko control kar niyamit karta hai, jo ki panchma bhav ki intelligence ko support karta hai. NAtural zodiac me ye bhav Simh hai jiske swami Surya hai jinhe aatmkaarak maana gaya hai.
You may like to read: Navagraha Sun – सूर्य को आत्मकारक क्यों माना गया है ?
6th House – rog, rin evam ripu ka bhav
Shashtham jyotish bhav ko rog, rin, ripu evam ari bhav se bhi jaana jaata hai. Is bhav ko kundli ka doosra dushsthaan maante hai, kudnli me sabse jyada dushsthaan ashtam bhav hai. Dushsthaan do shabdon se bana hai – Dushta matlab bura + sthaana matlab jagah, to is tarah ye bhav bura bhav banta hai.
Mangal grah ko chhod kar is bhav me sthit koi bhi grah dagdh (burnt) maana jaata hai, mangal yahan apvaad (exception) hai q ki mangal yahan se lagn ko drishti dekar use prabal karta hai. Praaya chhathe bhav ya iske swami se sambandh rakhne vaali koi bhi cheej bhrasht hokar ashubh fal degi, haalanki iske apvaad (exception) bhi hain jiske liye kundli ke gahan adhyayan ki jaroorat padti hai.
Chhathe bhav se kya dekhte hain?
Chhathe bhav se shatru, ladai jhagade, vivaad or kanooni kaaryvaahi, legal cases, kroorta, rog evam bimari, accidents jakhm chot, loans or karj, nuksaan virodh, rukavat mushkil, dukh vipada, saja (punishment), nirasha apmaan, maansik aaveg, chinta pareshani, chori, haani, bhay, pratispardha, seva bhav, contracts, paltu pashu, maama maami, souteli maa or noukar chaakar aadi dekhte hain.
Jab ham chhathe ghar se rogon ki baat karte hain to ye dekhna hota hai ki rog saadhya (jinka ilaaj ho skata hai) ya asaadhya (laa ilaaj rog). Jo curable rog hain vo chhathe ghar se dekhe jaate hain or jo incurable yaani asaadhya rog hain vo ahstam ke kaary kshetra me aate hain. Ashtam bhav ke rog jaanleva rog ho sakte hain par chhathe ghar ke rog jaanleva nahi hote.
6th house kanoon or nyaaya se bhi sambandhit hai. Chhathe ghar ke is pahlu ke liye is bhav ka sambandh dwiteey bhav or dwiteeyesh se aana chahiye, aisa ho to jatak bahut accha lawyer ya nyaaypalika ka vyavsaay ho sakta hai. Or agar Brahaspati or Ketu ka bhi association is bhav se ho jaye to jatak Judge ban sakta hai.
Physically, hips or chhoti aant is bhav ke adhikar me aate hain. Natural zodiac me chhatha bhav Kanya rashi hai jiske swami Budh hain. Halanki 6th house ek dushsthaan hai magar sakaraatmak roop me dhan sanchay (doosre arth kon hone ki vajah se), sports tatha adventure activities ke liye yah achha bhav hai. Mangal or Shani is bhav ke kaarak hain.
Join the Discussion!